غگ رپورٹ
خیبرپختونخوا میں تعلیمی اصلاحات اور دعوؤں کے باوجود سرکاری سکولوں کے میٹرک کے نتائج مایوس کن رہے، متعدد سکولوں میں طلبہ کی بڑی تعداد امتحانات میں ناکام ہو گئی جبکہ کئی اداروں میں تو تمام کے تمام طلبہ فیل قرار پائے ہیں۔ گورنمنٹ ہائر سیکنڈری سکول بیوری چترال کے تمام طلبہ فیل ہو گئے، گورنمنٹ مڈل سکول بیگشت چترال کے 7 طلبہ میں سے کوئی بھی کامیاب نہ ہو سکا۔
پشاور بورڈ سے منسلک 29 سکولوں کے 739 طلبہ نے میٹرک کے امتحانات میں شرکت کی جن میں سے صرف 151 طلبہ کامیاب ہو سکے۔چترال کے علاوہ پشاور، مہمند، خیبر اور چارسدہ سمیت متعدد اضلاع کے سرکاری تعلیمی اداروں کے نتائج شدید مایوسی کا شکار ہیں، گورنمنٹ گرلز ہائر سیکنڈری سکول ہریانہ پایان، پشاور کی 18 میں سے 18 طالبات فیل ہوئیں، گورنمنٹ گرلز ہائر سیکنڈری سکول دامن افغانی کی 35 میں سے 33 طالبات ناکام قرار پائیں، رجڑ چارسدہ کے ایک خواتین ہائر سیکنڈری سکول میں 13 طالبات میں سے صرف 2 پاس ہو سکیں۔گورنمنٹ ہائر سیکنڈری سکول ارسون چترال کے 6 میں سے 5 طلبہ فیل ہوئے، گورنمنٹ ہائر سیکنڈری سکول بیروم چترال کے 8 طلبہ میں صرف 1 کامیاب ہوا، گورنمنٹ مڈل سکول شیکڈی لوئر چترال کے 7 میں سے 5 طلبہ فیل ہوئے، گورنمنٹ ہائر سیکنڈری سکول بنگ چترال کے 9 میں سے 8 طلبہ فیل ہوگئے۔پشاور کے سکول بھی نتائج کے لحاظ سے زیادہ بہتر نہ رہے، گورنمنٹ شہید ثاقب غنی سکول کے 102 میں سے 84 طلبہ فیل، صرف 18 کامیاب ہو سکے، گورنمنٹ ہائر سیکنڈری سکول حاجی بانڈہ کے 14 میں سے 13 طلبہ فیل ہو گئے جبکہ گورنمنٹ ہائر سیکنڈری سکول ماشوگگر کے 76 میں سے صرف 5 طلبہ کامیاب ہو سکے۔دوسری جانب خیبرپختونخوا حکومت نے اس معاملے کی تفتیش کا فیصلہ کیا ہے، کہ لاکھوں روپے کی سہولیات اور اخراجات کے باوجود سرکاری سکولوں کی کاکردگی انتہائی ناقص رہی۔خیبرپختونخوا حکومت نے میٹرک امتحانات میں ناکام سرکاری سکولوں سے رپورٹ طلب کرلی ہے۔