6 اور 7 دسمبر کی درمیانی شب خیبر پختونخوا میں 3 مختلف آپریشن کیے گئے، آئی ایس پی آر
ٹانک کے علاقے گل امام میں خفیہ اطلاع پر کارروائی میں 9 خارجہ دہشت گرد مارے گئے، آئی ایس پی آر
شمالی وزیرستان میں کارروائی کے دوران 10 خارجہ دہشت گرد ہلاک کردیے گئے، آئی ایس پی آر
ٹل میں فورسز کی چوکی پر حملہ ناکام، تین خارجہ دہشت گرد مارے گئے، آئی ایس پی آر
پشاور(غگ رپورٹ) خیبرپختونخوا کے مختلف علاقوں میں گذشتہ روز تین مختلف مقامات پر سیکیورٹی فورسز کی کارروائیوں میں 22 خارجی دہشت گرد ہلاک کردیے گئے۔
پاک فوج کے شعبہ تعلقات عامہ (آئی ایس پی آر) کے مطابق 6 اور 7 دسمبر کی درمیانی شب یہ کارروائیاں ٹانک، شمالی وزیرستان اور ٹل میں کی گئیں۔
آئی ایس پی آر کے مطابق ضلع ٹانک کے علاقے گل امام میں خفیہ اطلاع کی بنیاد پر کارروائی کی گئی جس کے نتیجے میں 9 خارجی ہلاک جبکہ 6 زخمی ہوئے۔
دوسری کارروائی شمالی وزیرستان میں کی گئی جہاں 10 خارجی دہشت گردوں کو ہلاک کردیا گیا۔
آئی ایس پی آر کے مطابق تیسری کارروائی ضلع ٹل میں کی گئی جہاں فورسز کی چوکی پر حملے کی کوشش ناکام بناتے ہوئے تین خارجی دہشت گردوں کو مارا گیا۔
آئی ایس پی آر کے بیان کے مطابق شدید فائرنگ کے تبادلے میں بہادری سے لڑتے ہوئے چھ جوان بھی شہید ہوئے۔
صدر مملکت اور وزیراعظم کا کامیاب آپریشن پر سیکیورٹی فورسز کو خراج تحسین
صدرمملکت آصف علی زرداری نے سیکیورٹی فورسز کو خراج تحسین پیش کرتے ہوئے کہا ہے کہ 22 دہشت گرد ہلاک کرنا سیکیورٹی فورسز کی بڑی کامیابی ہے، دہشت گردوں کے مکمل خاتمے تک کارروائیاں جاری رہیں گی۔صدر مملکت نے پاک فوج کے چھ بہادر جوانوں کی شہادت پر اظہار افسوس کرتے ہوئے کہا کہ پوری قوم شہداء کو سلام پیش کرتی ہے۔ ملکی دفاع کیلئے ہمارا عزم غیرمتزلزل رہے گا۔
دوسری جانب وزیراعظم شہبازشریف کی جانب سے جاری بیان میں کہا گیا ہے کہ دہشتگردی کی عفریت کے خاتمے تک جنگ جاری رکھیں گے، پوری قوم سیکیورٹی فورسز کے شانہ بشانہ کھڑی ہے۔ شہبازشریف نے سیکیورٹی فورسز کے چھ جوانوں کی شہادت پر دکھ کا اظہار کرتے ہوئے کہا کہ شہید سیکیورٹی فورسز کے اہلکاروں کو خراج عقیدت پیش کرتے ہیں۔