بنوں میں تھانہ میریان کی حدود میں واقع نورڑ ملاگان مسجد میں دہشت گردوں کی فائرنگ سے ریٹائرڈ صوبیدار عطاء اللہ شاہ شہید جبکہ تین نمازی شدید زخمی ہوگئے۔
پولیس ذرائع کے مطابق واقعہ نمازِ عشاء کے دوران اس وقت پیش آیا جب دہشت گردوں نے سابق ملٹری انٹیلیجنس صوبیدار عطاء اللہ شاہ کو اغوا کرنے کی کوشش کی۔ اس موقع پر نمازیوں کی جانب سے مزاحمت پر دہشت گردوں نے اندھا دھند فائرنگ کردی جس کے نتیجے میں صوبیدار موقع پر ہی شہید ہوگئے اور تین نمازی زخمی ہوئے۔
زخمیوں کی شناخت عابد، میر قد ایاز اور کفایت اللہ کے ناموں سے ہوئی ہے، جنہیں فوری طور پر ڈسٹرکٹ ہیڈکوارٹر ہسپتال منتقل کردیا گیا۔ڈپٹی کمشنر بنوں محمد فہیم خان نے ڈی ایچ کیو ہسپتال کا دورہ کیا اور زخمیوں کی عیادت کی۔ انتظامیہ کے مطابق زیادہ زخمی افراد کو بہتر علاج کے لیے فوری طور پر پشاور منتقل کردیا گیا ہے۔مقامی ذرائع کے مطابق حملہ آوروں کی تعداد 30 سے 40 کے درمیان تھی اور وہ جدید اسلحہ سے لیس تھے۔ فائرنگ کے بعد دہشت گرد فرار ہونے میں کامیاب ہوگئے۔
دوسری جانب شمالی وزیرستان کے علاقے میرعلی میں دہشتگردوں کی فائرنگ سے ایلیٹ فورس کا اہلکار شہید ہو گیا ہے۔پولیس کے مطابق ایلیٹ فورس کا اہلکار محمد شعیب دوسلی کا رہائشی تھا، جسے میرعلی میں دہشتگردوں نے شہید کر دیا۔