خط کا مقصد فوج اور عوام کے درمیان فرق ڈالنا یا فوج اور کمانڈ کے درمیان غلط فہمیاں پیدا کی جائیں، رانا ثناء اللہ کا ردعمل
بانی پی ٹی آئی کو سیاسی جدوجہد کرنی ہے تو پارلیمنٹ میں کریں، مشیروزیراعظم کا بیان
بطور سابق وزیر اعظم اور پارٹی سربراہ عمران خان نے آرمی چیف کو 6 نکات پر مشتمل خط بھیجا ہے، وکیل فیصل چوہدری
پشاور(غگ رپورٹ) سابق وزیراعظم اور اڈیالہ جیل میں قید بانی پی ٹی آئی عمران خان نے آرمی چیف جنرل سیدعاصم منیر کے نام چھ نکات پر مشتمل خط لکھا ہے جس میں 8 فروری کے انتخابات کو فراڈ قرار دیا گیا ہے، منی لانڈرز کو جتوانے، 26ویں آئینی ترمیم، قانون کی حکمرانی، القادر ٹرسٹ، دہشت گردی کے پرچے، چھاپے اور گولیاں چلانے اور انٹیلی جنس اداروں کے کام سے متعلق نکات شامل ہیں۔
پی ٹی آئی کے وکیل فیصل چوہدری اور چیئرمین بیرسٹر گوہر کی جانب سے بھی اس خط کی تصدیق کی گئی ہے تاہم خط ابھی تک سامنے نہیں آیا ہے۔
دوسری جانب وزیراعظم کے مشیر برائے سیاسی امور راناثناء اللہ نے خط پر ردعمل دیتے ہوئے کہا ہے کہ عمران خان کے آرمی چیف جنرل عاصم منیر کے نام خط کا مقصد فوج اور عوام میں فرق ڈالنا ہے یا فوج اور اُس کی کمانڈ کے درمیان غلط فہمیاں پیدا کی جائیں۔
رانا ثناء اللہ کے مطابق کیا یہ خط جیل سے لکھے جارہے ہیں؟ یہ کہاں سے آتے ہیں؟ بانی پی ٹی آئی کو سیاسی جدوجہد کرنی ہے تو پارلیمنٹ میں کریں۔
انہوں نے سوال اٹھایا کہ کیا اسلام آباد ہائیکورٹ میں ججوں کا تبادلہ کرکے ہم نے آئین سے ماورا کوئی اقدام اٹھایا ہے؟ کیا آرٹیکل 200، 26ویں ترمیم کےذریعے آئین میں ڈالا گیا ہے یا اُس میں کوئی ترمیم کی گئی ہے؟اگر سوال اٹھانے پر آئیں تو ججز کے خط پر بھی بڑے سوالات اٹھتے ہیں۔
رانا ثنا اللہ کا کہنا تھا کہ جسٹس بابر ستار اور جسٹس طارق جہانگیری کی تعیناتی رکوانے کے لیے پی ٹی آئی کی حکومت سر کے بل کھڑی ہو گئی تھی۔ کیا متعلقہ چیف جسٹس اور جج غلط ہیں اور جنہوں نے خط لکھا ہے وہ ٹھیک ہیں؟
(4 فروری 2025)