آرمی چیف جنرل سید عاصم منیر کی مختلف جامعات سے آئے طلبہ و طالبات سے گفتگو

ہم کامریڈز کی طرح لڑتے ہیں، ہمارے لئے سب سے اہم پاکستانیت ہے، آرمی چیف جنرل سید عاصم منیر

جب تک قوم خصوصاً نوجوان ساتھ کھڑے ہیں پاک فوج کبھی نہیں ہارے گی، جنرل سید عاصم منیر کی گفتگو

پشاور(غگ رپورٹ) پاک فوج کے سربراہ جنرل سید عاصم منیر نے کہا ہے کہ ہمیں اپنے مذہب اور تہذیب پر فخر ہے، کبھی بھی فتنہ الخوارج کو اپنی فرسودہ سوچ ملک پر مسلط نہیں کرنے دیں گے۔ پاکستانی عوام بالخصوص نوجوانوں کا پاک فوج سے ایک انتہائی مضبوط رشتہ ہے، ملک دشمن عناصر کی فوج اور عوام کے درمیان خلیج ڈالنے کی کوشش ہمیشہ ناکام رہی ہے اور رہے گی۔

پاک فوج کے شعبہ تعلقات عامہ آئی ایس پی آر کے مطابق ملک بھر کی مختلف جامعات سے آئے طلبہ و طالبات سے گفتگو کرتے ہوئے آرمی چیف جنرل سید عاصم منیر نے کہا کہ جب تک قوم خصوصاً نوجوان ساتھ کھڑے ہیں پاک فوج کبھی نہیں ہارے گی، ہم کامریڈز کی طرح لڑتے ہیں، ہمارے لیے پاکستانیت سب سے اہم ہے۔

خیبرپختونخوا اور بلوچستان کے عوام کی قربانیوں کو خراج تحسین پیش کرتے ہوئے انہوں نے کہا کہ خیبرپختونخوا اور بلوچستان کے غیور لوگ دہشتگردوں کے خلاف آہنی دیوار کی طرح کھڑے ہیں۔

آرمی چیف کا کہنا تھا کہ ہمیں اپنے مذہب، تہذیب اور روایات پر فخر ہے، یہ فتنہ الخوارج کس شریعت اور دین کی بات کرتے ہیں؟ ہم کبھی بھی فتنہ الخوارج کو اپنی فرسودہ سوچ ملک پر مسلط نہیں کرنے دیں گے۔

ہم مذہب کی ان کی تشریح سے متفق نہیں ہیں، اسلام دنیا میں سب سے پہلا مذہب ہے جس نے عورت کو عزت دے کر آسمان تک پہنچایا، چاہے ایک عورت ماں ہو، بیوی یا بہن کسی بھی کردار میں اسلام نے عورت کو عزت دی ہے۔

آرمی چیف کا کہنا تھا کہ فتنہ الخوارج کون ہوتے ہیں اس مقام کو چھیننے والے؟ تمہیں یہ اختیار کس نے دیا؟ اسے کوئی نہیں چھین سکتا، ہم اس قسم کے گمراہ گروہ کو کبھی بھی اپنے ملک پر اپنی اقدارمسلط کرنے کی اجازت نہیں دیں گے۔

جنرل سید عاصم منیر نے مزید کہا کہ ہم فتنہ الخوارج کے فسادیوں سے لڑ رہے ہیں، یہ عناصر اسلام کی غلط تشریح کررہے ہیں، خارجی عناصر اسلامی تعلیمات کی خلاف ورزی کررہے ہیں، فسادیوں کے بارے میں اسلام کے احکامات بہت واضح ہیں۔

(16 فروری 2025)