شدید فائرنگ کے تبادلے میں ایک فوجی جوان شہید، آئی ایس پی آر
کارروائیاں شمالی وزیرستان، جنوبی وزیرستان، خیبر اور بنوں میں کی گئیں، آئی ایس پی آر
پشاور (غگ رپورٹ) خیبرپختونخوا کے مختلف علاقوں میں سیکیورٹی فورسز کی کارروائیوں میں 8 خارجی دہشت گرد ہلاک جبکہ شدید فائرنگ کے تبادلے میں ایک فوجی جوان شہید ہوگئے۔
پاک فوج کے شعبہ تعلقات عامہ آئی ایس پی آر کے مطابق شمالی وزیرستان میر علی میں انٹیلی جنس پر مبنی آپریشن کیا گیا جس میں خوارج کے ٹھکانے کو مؤثر نشانہ بنایا، جس کے نتیجے میں تین خوارج مارے گئے۔
اسی طرح جنوبی وزیرستان میں کیے گئے ایک اور آپریشن میں سیکیورٹی فورسز نے 2 خارجی دہشتگردوں کو ہلاک کردیا، تاہم شدید فائرنگ کے تبادلے میں 40 سالہ نائیک مجاہد خان ( رہائشی کوہاٹ) نے بہادری سے لڑتے ہوئے جام شہادت نوش کیا۔
آئی ایس پی آر کے مطابق ضلع خیبر اور ضلع بنوں میں سیکیورٹی فورسز اور خوارج کے درمیان دو مزید جھڑپیں ہوئیں، جس کے نتیجے میں تین خوارج مارے گئے۔
آئی ایس پی آر کے مطابق ہلاک خوارج سے اسلحہ، گولہ بارود اور دھماکا خیز مواد بھی برآمد ہوا، یہ دہشتگرد علاقے میں سیکیورٹی فورسز کے خلاف دہشت گردی کی متعدد کارروائیوں کے ساتھ ساتھ معصوم شہریوں کی ٹارگٹ کلنگ میں بھی ملوث تھے۔
پاک فوج کے شعبہ تعلقات عامہ کے مطابق علاقے میں موجود کسی اور خارجی کو ختم کرنے کے لیے کلیئرنس آپریشن کیا جا رہا ہے۔پاکستان کی سیکیورٹی فورسز دہشت گردی کی لعنت کو ختم کرنے کے لیے پرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔
(6 مئی 2025)