6 اور 7 مئی کی درمیانی شب بھارت افواج نے بلااشتعال اور قابل مذمت وحشیانہ حملے شروع کئے، آئی ایس پی آر
حملوں میں خواتین،بچوں، بوڑھوں اور معصوم شہریوں کو نشانہ بنایا گیا، آئی ایس پی آر
شہداء میں 7 خواتین، 15 بچے شامل، زخمیوں میں 10 خواتین اور 27 بچے شامل ہیں، آئی ایس پی آر
اسلام آباد( غگ رپورٹ) پاکستان کی جانب سے بھارتی جارحیت اور وحشیانہ حملوں میں شہداء اور زخمیوں کی تفصیل جاری کردی گئی۔
پاک فوج کے شعبہ تعلقات عامہ (آئی ایس پی آر) کے مطابق 6 اور7 مئی کی درمیانی شب، بھارتی افواج نے بلا اشتعال اور قابل مذمت وحشیانہ حملے شروع کیے، ان حملوں میں خواتین، بچوں اور بوڑھوں سمیت معصوم شہریوں کو نشانہ بنایا گیا۔
بیان کے مطابق بھارتی حملوں میں 40 شہری شہید ہوئے جن میں7خواتین اور 15 بچے شامل ہیں جبکہ حملوں میں 10خواتین اور 27 بچوں سمیت 121 افراد زخمی ہوئے۔
آئی ایس پی آر کے مطابق بھارتی جارحیت کے جواب میں پاکستانی مسلح افواج نے بھرپور جوابی کارروائی کی اور مادروطن کا دفاع کرتے ہوئے 11 جوانوں نے جام شہادت نوش کیا جب کہ مسلح افواج کے 78 جوان زخمی ہوئے۔
شہید ہونے والے جوانوں میں نائیک عبدالرحمان،لانس نائیک دلاور خان،لانس نائیک اکرام اللہ، نائیک وقار خالد، سپاہی محمد عدیل اکبر اور سپاہی نثار شامل ہیں۔
اس کے علاوہ پاک فضائیہ کےاسکوارڈن لیڈرعثمان یوسف، چیف ٹیکنیشن اورنگزیب،سینئر ٹیکنیشن نجیب، کارپورل ٹیکنیشن فاروق اور سینئر ٹیکنیشن مبشر بھی شہداء میں شامل ہیں۔
آئی ایس پی آر کے بیان میں مزید کہا گیا ہے کہ شہداء کی عظیم قربانی، ہمت، لگن اور غیر متزلزل حب الوطنی کی لازوال علامت ہے، شہدا کی عظیم قربانی کو ہمیشہ یاد رکھا جائے گا، قوم جارحیت کے سامنے پرعزم ہے، اس میں کوئی ابہام نہیں رہنا چاہیے،پاکستان کی خودمختاری یا علاقائی سالمیت کو چیلنج کرنے کی کوشش کا بھرپور اور فیصلہ کن جواب دیا جائیگا۔
(11 مئی 2025)