خیبرپختونخوا سیلاب متاثرین امداد میں تاخیر کے باعث مشکلات کا شکار ہیں، اور اب بھی حکومتی امدادی پیکیج کے منتظر ہیں، اس حوالے سے جاری دستاویزات میں بتایا گیا ہے کہ صوبے کے مختلف اضلاع میں سیلاب کے نتیجے میں جاں بحق اور زخمی ہونے والے 286افراد کو ابھی تک مکمل امداد فراہم نہیں کی گئی، جبکہ 74 جاں بحق افراد کے لواحقین اعلان کردہ 20،20 لاکھ روپے کے منتظر ہیں، انہیں ادائیگی نہیں ہوئِی ہے۔
دستاویز میں بتایا گیا ہے کہ 247 زخمیوں میں سے صرف 35 افراد کو ہی امداد دی گئی ہے، جبکہ 212 زخمی اب بھی انتظار میں ہیں، گھروں کے نقصانات کے معاوضے میں بھی سست روی برقرار ہے، تباہ ہونے والے 598 گھروں میں سے صرف 36 مالکان کو معاوضہ ملا، جبکہ 562 اب بھی محروم ہیں۔جزوی طور پر سیلاب سے متاثرہ 2 ہزار 971 گھروں میں سے صرف 7 کو معاوضہ دیا گیا ہے، جبکہ باقی 2 ہزار 964 افراد تاحال حکومتی امداد کے منتظر ہیں۔
دوسری جانب پی ڈی ایم اے کے ڈائریکٹر جنرل اسفندیار خٹک کا کہنا ہے کہ جاں بحق افراد کے لواحقین کو 20 لاکھ اور زخمیوں کو 5 لاکھ روپے دینے کا اعلان کیا گیا ہے، بیشتر متاثرین کو امداد دی جا چکی ہے جبکہ باقی کو جلد از جلد رقم فراہم کر دی جائے گی۔
ادھر وزیراعلیٰ خیبر پختونخوا علی امین گنڈاپور نے کہا ہے کہ سیلاب متاثرین کیلئے معاوضے دگنے کر دیئے ہیں، نقصانات کا سو فیصد ازالہ کریں گے۔