عقیل یوسفزئی
وزیر اعلیٰ خیبر پختونخوا علی امین گنڈاپور نے مانسہرہ میں پارٹی کے جلسے سے خطاب اور راولپنڈی میں میڈیا سے گفتگو کرتے ہوئے اپنے چیئرمین عمران خان کی گرفتاری سے متعلق معاملات پر انتہائی حد تک سخت اور تلخ لہجہ استعمال کرتے ہوئے پاک فوج کے سابق سربراہ سمیت بعض دیگر کو موجودہ حالات کا ذمہ دار قرار دیتے ہوئے یہاں تک کہا ہے کہ وہ اپنے لیڈر کے دفاع میں گولی کھانے سے بھی دریغ نہیں کریں گے ۔ وزیر اعلیٰ نے جذبات میں آکر بعض سابق عسکری حکام کو ” غدار” جیسے الفاظ سے مخاطب کرنے سے بھی گریز نہیں کیا اور اپنی پارٹی کے ایک سابق وزیر اعلیٰ پرویز خٹک سمیت متعدد دیگر کو سنگین نوعیت کی دھمکیاں بھی دیں ۔ اس سے قبل انہوں نے انتقامی طور پر اپنی پارٹی کے ایک اور سابق وزیر اعلیٰ محمود خان کے سوات میں شروع کردہ ان درجنوں ترقیاتی منصوبوں کو نئے بجٹ سے نکال کر ان پر منصوبوں پر بھی کام رکوادیا ہے جو کہ تکمیل کے آخری مراحل میں تھے اور ان پر سرکاری خزانے سے اربوں روپے خرچ کیے جاچکے ہیں ۔ ان میں بعض علاقوں کو پینے کے صاف پانی کے منصوبے بھی شامل ہیں ۔ بعض دیگر سابق وزراء کے حلقوں میں بھی یہی رویہ اختیار کیا گیا ہے جو کہ زیادتی ہے ۔
یہ بات قابل تشویش ہے کہ عدالتوں کی جانب سے پاکستان تحریک انصاف کو مسلسل رعایتیں ملنے کے باوجود یہ پارٹی سیاسی اختلافات کی بجائے ذاتی انتقام کے رویوں پر اتر آئی ہے اور اس کے لیڈرز اور ” کی بورڈ واریئرز ” اس تصادم میں انٹرنیشنل کوریڈور اور پاکستان مخالف لابیز کو بھی استعمال کرنے سے گریز نہیں کررہے ۔
ایسا ہی رویہ اس پارٹی اور اس کی صوبائی حکومت کی جانب سے ” عزم استحکام ” اور اس پر وزیر اعظم کی جانب سے طلب کی گئی آل پارٹیز کانفرنس کے معاملے پر دیکھنے کو مل رہا ہے ۔ جب سے اسد قیصر ، وزیر اعلیٰ اور بعض دیگر کی جانب سے ” عزم استحکام ” کی مخالفت میں بیانات سامنے آئے ہیں صوابی سمیت مین سٹریم خیبرپختونخوا کے مختلف علاقوں میں طالبان کی نقل و حرکت اور حمایت میں اضافہ ہوا ہے کیونکہ اس پارٹی کے لوگ نہ صرف عزم استحکام کی کھل کر مخالفت کررہے ہیں بلکہ کارکن ریاست کی اندھی مخالفت میں اپنے لیڈروں کی پیروی کرتے ہوئے طالبان وغیرہ کی وکالت اور حمایت بھی کرنے لگے ہیں جو کہ انتہائی تشویشناک اور خطرناک بات ہے اور غالباً انہی عوامل کو سامنے رکھ کر حالیہ کور کمانڈرز کانفرنس میں اس نوعیت کے بیانیے اور پروپیگنڈے پر تشویش کا اظہار کیا گیا ۔ وزیر اعلیٰ کو چاہیے کہ وہ قومی سلامتی کے معاملات پر پولیٹیکل پوائنٹ اسکورنگ کی بجائے صوبے کے سیکورٹی اور انتظامی معاملات کی بہتری پر توجہ مرکوز کریں کیونکہ خیبرپختونخوا کو واقعتاً شدید چیلنجر کا سامنا ہے ۔