دہشت گردی کی لعنت کے خاتمے کیلئے ایک سیاسی آواز اور عوامی حمایت کی ضرورت پر اتفاق
امن خراب کرنے والوں کی کسی بھی کوشش کا فیصلہ کن جواب دیا جائے گا، آرمی چیف جنرل سید عاصم منیر
پشاور(غگ رپورٹ)آرمی چیف جنرل سید عاصم منیر نے کہا ہے کہ شیطانی قوتوں کے خلاف یکجا کھڑے ہیں، امن خراب کرنیوالوں کی کسی بھی کوشش کا فیصلہ کن جواب دیا جائے گا۔ ہم برائی کی قوتوں کے خلاف متحد ہیں، دشمن سے آہنی ہاتھوں سے نمٹیں گے، یہ جنگ جاری ہے اور اسے منطقی نتیجے تک پہنچائیں گے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر نے گذشتہ روز پشاور کا دورہ کیا جہاں انہوں نے مختلف سیاسی جماعتوں کے رہنماؤں سے ملاقات کی، وفاقی وزیرداخلہ محسن نقوی، گورنرخیبرپختونخوا فیصل کریم کنڈی اور وزیر اعلیٰ خیبرپختونخوا علی امین گنڈا پور بھی شریک تھے۔
آرمی چیف جنرل عاصم منیر نے دہشت گردی کے خلاف مسلح افواج اور قانون نافذ کرنے والے اداروں کے غیرمتزلزل عزم اور بے مثال قربانیوں کو سراہتے ہوئے کہا ہے کہ شیطانی قوتوں کے خلاف یکجا کھڑے ہیں، امن خراب کرنے والوں کی کسی بھی کوشش کا فیصلہ کن جواب دیا جائے گا۔
پاک فوج کے شعبہ تعلقات عامہ (آئی ایس پی آر ) کی جانب سے جاری بیان کے مطابق آرمی چیف نے پشاور کا دورہ کیا، اس دوران انہیں فتنہ خوارج کے خلاف انسداد دہشت گردی آپریشنز اور سیکیورٹی صورتحال پر جامع بریفنگ دی گئی۔
آرمی چیف نے مسلح افواج اور قانون نافذ کرنے والے اداروں کے غیر متزلزل عزم اور بے مثال قربانیوں کو سراہا اور کہاکہ افواج پاکستان اور قانون نافذ کرنے والے ادارے دہشت گردوں کے مذموم ایجنڈے کو ناکام بنانے میں اہم کردار ادا کر رہے ہیں، افواج نے ان تھک محنت سے دہشت گردوں کے اہم سرغنوں کا تعاقب کر کے انہیں ختم کیا ہے۔
ان کا کہنا تھاکہ سکیورٹی فورسز کی شاندار کامیابیوں پر فخر ہے، ہم نے اپنی سرحدوں کے اندر اور باہر دہشت گرد تنظیموں کی آپریشنل صلاحیتوں کو کامیابی سے کم کر دیا ہے، افواج پاکستان نے دہشت گردوں کے بنیادی ڈھانچے اور ان کے سیلوں کا خاتمہ کیا، اس سے یہ واضح پیغام گیا ہے کہ دہشت گردی کی ہماری سرزمین پر کوئی جگہ نہیں اور فورسز کا ہر آپریشن سکیورٹی فورسز کی جرات، پیشہ وارانہ مہارت اور آپریشنل تیاریوں کا منہ بولتا ثبوت ہے۔
جنرل عاصم منیر نے کہا کہ سکیورٹی فورسز دہشت گردوں کی طرف سے لاحق خطرات ناکام بنانے میں مصروف ہیں۔
آرمی چیف نے فوجی جوانوں کے غیرمعمولی حوصلے کی تعریف کی اورکہاکہ یہ جوان قوم کی خود مختاری کے تحفظ کے اپنے عزم پر ثابت قدم ہیں، یہ مادر وطن اور اس کے لوگوں کے تحفظ کیلئے اپنے مشن میں پرعزم ہیں۔
آئی ایس پی آر کے مطابق سیاسی نمائندوں نے دہشت گردی کے خلاف مسلح افواج اور قانون نافذ کرنے والے اداروں کی غیرمتزلزل حمایت کا اظہار کیا اور دہشت گرد گروپوں کے خلاف سیاسی وابستگی سے بالاتر ہو کر ایک متحد محاذ کی ضرورت پر اتفاق کیا۔
(14جنوری 2025)