وہ ہائبرڈ جنگ سے پاکستان کو کمزور کرنے کی حکمت عملی پر عمل پیرا ہیں
اس میں افواج پاکستان اور اس کی قیادت کے خلاف جھوٹے الزامات شامل ہیں
سب سوشل میڈیا کے ذریعے کیا جا رہا ، اس کے پیچھے ہندوستان اور اسرائیل ہیں
صدرایکس سروس مین سوسائٹی پاکستان کا تقریب سے خطاب
چکوال (غگ رپورٹ) ایکس سروس مین سوسائٹی پاکستان کے صدر لیفٹیننٹ جنرل (ر) عبدالقیوم نے کہا ہے کہ دشمن پاکستان کو پھلتا پھولتا نہیں دیکھنا چاہتے،وہ ہائبرڈ جنگ سے پاکستان کو کمزور کرنے کی حکمت عملی پر عمل پیرا ہیں، اس میں افواج پاکستان اور اس کی قیادت کے خلاف جھوٹے الزامات شامل ہیں جو سوشل میڈیا کے ذریعے کیا جا رہا ہے۔ اس کے پیچھے ہندوستان اور اسرائیل ہیں۔
چکوال میں پوسٹ گریجوایٹ کالج ہورایزن میں محمود مریم ٹرسٹ کی طرف سے غریب خاندانوں کے لائق بچوں میں وظائف کی رقوم تقسیم کرنے کی تقریب سے خطاب کرتے ہوئے ایکس سروس مین سوسائٹی پاکستان کے صدر لیفٹینیٹ جنرل (ر) عبدالقیوم نے کہا کہ محمود مریم ٹرسٹ ایک نہایت قابل ایکس سروس مین مرحوم بریگیڈئر طارق محمود (ای ایم ای) نے اپنے بھائیوں کرنل اختر (آرمڈ کور) اور میجر ڈاکٹر ناصر کی مدد سے بنایا اور اس میں ان کا خاندان ہر سال لاکھوں روپے ادا کرتا ہے۔
تقریب سے خطاب کرتے ہوئے انکا کہنا تھا کہ اس ملک کے دشمن اب ایٹمی پاکستان کے خلاف فوجی یلغار کا خطرہ مول نہیں لے سکتے لیکن وہ پاکستان کو پھلتا پھولتا بھی نہیں دیکھنا چاہتے۔ اس لیے اب وہ ہائبرڈ جنگ کے ذریعے پاکستان کو اندر سے کمزور کرنے کی حکمت عملی پر عمل پیرا ہیں جس میں سفارتی تنہائی، معاشی بدحالی، سماجی افرا تفری، سائبر جنگی ہتھکنڈے،بدترین سیاسی تناؤ، دہشتگردی اور سب سے بڑھ کر افواج پاکستان اور اس کی قیادت کے خلاف جھوٹے الزامات شامل ہیں۔
انہوں نے کہا یہ سب کچھ سوشل میڈیا کے ذریعے کیا جا رہا ہے اور اس کے پیچھے ہندوستان اور اسرائیل ہیں۔نوجوان نسل کو خبردار رہنا چاہئے چونکہ جہاں سوشل میڈیا کے بے پناہ فوائد ہیں جس سے ہمیں ضرور مستفید ہونا بھی چاہیے وہاں اس کے زہرآلود منفی اور گمراہ کن پراپیگنڈے سے بچنا بھی ضروری ہے۔ یہ فیصلہ اب والدین سے بڑھ کر نوجوان نسل کو خود کرنا ہوگا۔