وزیر اعظم کے مشکور ہیں جنہوں نے اس منصوبہ کے لئے وفاقی بجٹ میں رقم مختص کی، گورنرخیبرپختونخوا
یہ نئی صنعتوں کا قیام ہوگا، معاشی ترقی ہوگی لوگوں کو روزگار مہیا ہوگا اور علاقہ ترقی کرے گا، چیئرمین واپڈا سے ملاقات میں گفتگو
اسلام آباد(غگ رپورٹ) گورنر خیبرپختونخوا فیصل کریم کنڈی نے جمعہ کے روز چیئرمین واپڈا لیفٹیننٹ جنرل (ر) سجاد غنی سے خصوصی ملاقات کی جس میں چشمہ لفٹ کینال منصوبہ پر تبادلہ خیال کیا گیا اور پیش رفت پر واپڈا حکام کے کردار کو سراہا گیا۔ گورنر کے ہمراہ خیبرپختونخوا اسمبلی میں پارلیمانی لیڈر احمد کریم کنڈی بھی موجود تھے۔
ملاقات کے دوران گورنر گورنر خیبرپختونخوا فیصل کریم کنڈی کا کہنا تھا کہ 1991 کے ارسا معاہدہ کے نتیجہ میں چاروں صوبوں کو ملنے والے پانی کے حق کو تین صوبوں نے استعمال کرنا شروع کردیا جبکہ خیبر پختونخوا اس معاہدہ کے تحت ملنے والے پانی کے حصہ سے محروم تھا۔ وزیر اعظم پاکستان محمد شہباز شریف کے شکر گزار ہیں جنہوں نے اس منصوبہ کے لئے وفاقی بجٹ میں رقم مختص کی۔
انہوں نے کہا کہ چشمہ لفٹ کینال کے حوالہ سے چیئرمین بلاول بھٹو زرداری کے مشکور ہیں جنہوں نے ہمارا یہ مقدمہ لڑا۔ وفاق کے ساتھ اس نہر کے بننے سے خیبر پختونخوا میں سبز انقلاب آئے گا۔ یہ نئی صنعتوں کا قیام ہوگا، معاشی ترقی ہوگی لوگوں کو روزگار مہیا ہوگا اور علاقہ ترقی کرے گا۔ ان کا مزید کہنا تھا کہ توانائی کے وفاقی وزیر اور بالخصوص چیئرمین واپڈا کا کردار اور ذاتی دلچسپی لائق ستائش ہے ۔ اس حوالہ سے فنڈز کی فراہمی پر سعودی ڈیویلپمنٹ بنک اور سعودی حکومت کے تعاون کے بھی شکر گزار ہیں۔ رواں سال اس منصوبے کے تعمیراتی کام کا آغاز کردیا جائے گا۔